وصاتي - نورة الدوسري

من قبل لا تبعد دروبك خطاويك
وتشتت أحلام العمر في يدينك

اسمع ترا عندي كلامٍ بوصيك
واحفظ وصاتي بين قلبك وبينك

ان كان لي عندك غلا كثر مااغليك
أبغيك تذكرني بقايا سنينك

وان عاندت دنياك حبٍ سكن فيك
والقلب عيا يتبع إلا حنينك

مثلك عصاني قلبي وقام يرجيك
من وين ما اقفيت يبقى قرينك

روّح ولو راحت معك روح مغليك
بس لا تهل الدمع من مقلتينك

تكفى حبيبي مثل ما كنت ابغيك
اهتم في حالك .. وربي يعينك

مابي أحاتي من بعد ما أخليك
تكفى تفائل لا تعقّد جبينك

وان مرت الايام كنها تعاديك
ولا لقيت اللي يشدها يمينك

روحي تلاقيها بقربك تلبيك
تلقاني ابلحظات قدام عينك