يمه خذيني - نورة الدوسري

جيت ومعي ورده..ونظره خجوله
والكلمه اللي ودها تعزف أعذار

إحترت أبدي بأيش وهيه زعوله
لجلك يايمه تهت والفكر محتار

قربت منها .. والخطاوي كسوله
والقلب رعشاته غدت نار في نار

قلت السموحة .. والرجا بس اطوله
ذاك الرضا اللي أطلبه ليل ونهار

شفت ابعنيها دمع .. سابق نزوله
كفٍّ مسح بخدودها ريق لزهار

واثري بحضن الورد كلي نحوله
تروي جفافي عطفها سيل مدرار

وابإيدها أرجع سنين الطفوله
كني أنا طفلة وأحضانها اسوار

قمت آتذكر والليالي عجوله
إسنين مرت ما بها أيّ أسرار

واليوم قلبي من عنا الوقت حوله
خلى الملامح صامته داخل ايطار

يمه خذيني واعذري ما أقوله
بعض الحكي يخنق غروري وأنهار

ولا جيت يمك غرقيني ابهطوله
حبٍ ملاني وابتدى منه مشوار