يا مْطول الليل - يونس سلمان

يا مْطول الليل يابحرٍ بلا شاطي
قلبي سفينه وبحرك هاجت أمواجه

كنك مع قسوة الأيام متواطي
وان قلت مابه تواطي .. (بينكم حاجه)

الشوق نار بأقصى ضامري تاطي
وحالي سجين ايترقب لحظة افراجه

أعصاب قلبي لهيب اشفيك متباطي
مادري .. حبست الشعور بوسط ثلاجه؟

مدمن من الحب والأشواق متعاطي
ماغير ابر شوفتك تقدر على مْزاجه

كلما رسمتك رحيل ماتزهب شناطي
حبك رسم فوق رسمي لوحة أسياجه

ياهيه قلبك على قلبي غدى ساطي
مابين لحظه ولحظه سنين أحتاجه

لاهو خذ الحب مني ولاهو بعاطي
كنه أخذ من جروح النفس منهاجه

يامْطول الليل ياهم معي باطي
لا زحت بي جرح ولاهليت يا سراجه

كاني غلطت بحقوقك حدّد أغلاطي
في ساحة الحب خل لقلوب تتواجه

يا أسرج خيول جرحي وأقبل إحباطي
أو تاخذ القلب مني وتبدي علاجه