لاجل خاطر مره - خالد رجب
انا ادري ان الزمن ماهو على مايرام
وإنه زمان الفضاء والغث والانتره
لكن ماعاد يمدينا نشيل الحسام
والشمس ماعاد تشرق في زمن عنتره
القصر يفرض على العالم تعاف الخيام
والناس مايدفنون الحي في المقبره
يا صاحبي من سعى للحرب قبل السلام
يعض كف الندامه قبل مايخسره
بعض الرجاجيل عندي مايساوي خطام
وبعض الرجاجيل لو يخطي علي اعذره
واللي إلى شافني حرم جلوسه وقام
اقوم من مجلسي واغليه واقدره
واللي بلاذنب يحسبني الد الخصام
ماهو كفو والذي ماهو كفو باخسره
واللي نهار الطلب ماهو لظهري حزام
ابيع مليون مثله لاجل خاطر مره
وإن شاء الله إن الصباح يشق صدر الظلام
والحق يدمغ كيان الباطل ويقهره