وداد - خالد صالح الحربي
فناجيلك تغنّي لك فنا جيلك
ضريبة كونك المركون في رفّه
كذا يعني تنادي لك مناديلك
على بُعد انكسار الضوء من ضِفّه
إذا كلّك على بعضك تفاصيلك
أمانة شوف عُمري الناقص وْوَفّه
هِنا كنت أقتبس بلّور قنديلك
وهِناك المبتئس بالنور من عِفّه
هِنا كنت أكتبك وآعيد ترتيلك
وهِنا كنت أشطبك وآعيدك بْخِفّه
معي بالذاكرة ليلين من ليلك
شِف اللي ودّك مْن الماضي تْلفّه
أناجيلك قرتني قبل ماآجيلك
على جُنْح الخيال ورفرفة: زَفّه
وداد : ولا مداي إلا مداهيلك
وداد : الأمتداد لْ ترجح الكفّه
معك ما للمساء إلا يغنّي لك
ومعي هذا الغِنا ماينبس بشِفّه
طريقي ريقي اللي مايودّي لك
نشَف ريق انعتاقه دون ماتْحفّه
وش أحكي لك وأناللي كل ماأحكي لك
أضيّع هَالكلام المُتْعَب بْ صَفّه
بلاش من الحكي بآقول: كلّي لك
وأباأركن كل هذا الكون في رُفّه