صدفة - خلف الكريع
صدفه .. وكان الحب مات ولا بقى منّه قليل
وحبيبتي تزوّجت مدري رضا أو مجبره ؟
جابت عيال ، ولابقى من ذكريات الحب حيل
والورده اللي اهديتها ، صارت مع الوقت شجره
كنا نسينا الحب والاحلام والصبر الكليل
وماعاد يكوينا الفراق ولا يتعّبنا سفره
كنا التهينا بالزمن عن سيرة الماضي الجميل
والكل منا عاش عمره زي مالله قدّره
وبعد الهوى ما صام عشر سنين ماروّاه سيل ..
قابلتها صدفه .. وصاااح القلب مدري شذكّره ؟
يمكن تذكّر : شاعرية عاشقٍ شهم وأصيل
يوم القصايد كانت جروحٍ تلّون دفتره
يمكن تذكّر : نجمةٍ بيضا وميعادٍ بخيل
ووعود بنتٍ حالمه .. ومدلّعه .. ومقمّره
يمكن تذكّر : أغنية فرقا ودمعٍ له يسيل
ولا تذكّر ليله القاسي وغيبات قمره
يمكن تذكّر : لعبة الجدران واعساف النخيل
ولا تذكّر جدّه ودعواه له بالمغفره
يمكن تذكّر : طفلةٍ متستّره بثياب ليل
لما تثاوب / هالصباح بفمّها / من سهّره ؟
كانت تجي مثل ( الوقار ) بدعوة الشيخ الجليل
وكنت أتذكرني ( طفل ) غرامها يحني ظهره
عاف : الدراسة ، والرياضيات ، والشرح الطويل
مزّق كتابه طشطش اقلامه وكبّ المحبره
كم مرّةٍ لقوه يشرب بآخر الحصّه ( مزيل )
من شان يمحي من خياله ذكرياتٍ تقهره
يمكن تذكّر : شب وحداني كبير ماله خليل
شهقة هدبها / بس في شهقة هدبها / تسحره
يمكن تذكّر : يوم دقت تجرحه جرحٍ نبيل
وتقول : ( لاتحلم تراني لابن عمّي محيّره )
يمكن تذكّر : يوم زفتّها ، وكان الحزن ويل
ماحاولت تحزن على شانه ولا .. تتذكّره
صارت حياته سالفه / تحكي عن ايام الرحيل
وصارت دموعه واقفه / مابين فمه ومحجره
الليل يثني خطوته في هالطريق المستحيل
والموت يحفر لاجمل احلامه بالارض ويقبره
يمكن تذكّر يوم عانى ذاك ( مشقوق الشليل )
الشاعر اللي ماتت اسعاره قبل ماتشهره
سم الطواعن والوجع في جسمه الرث النحيل
يكبر .. ويكبر في فضا ذكراه غبنه وقْهره
والحين .. هذي هي قبالي مثل : عود الزنجبيل
كأنها حبيبتي ؟ وكأنها متغيّره ؟
وانا كبرت وصرت شاعر ينظم السحر ويخيل
من كل ليلٍ نجمه .. ومن كل عنقود ثْمره
حزني كبر : صدفه ، ويمكن صرت رجّالٍ ثقيل
اغري مزامير الشجر .. في بيت ماعرف بحره
وهذي هي اول من سرق طفولتي لعيون ليل
هالحين قدامي .. وانا ، عااادي ولا شي اشعره
يمكن ، وهي لمّا تذكّر :موقفي المر الذليل
تدرك بأن الله ما يضيّع من الحق شْعَرَه
صدفه .. مجرّد صدفه .. وما آمنت بالمستحيل
عاشت مع الورده وصارت .. طفلة احلامي : مَره