بنت الأكابر - خلف الكريع
بنت الأكابر : في الجناح الخاص ( حق الاثريا )
غرفه رقم (7) وتحويلتها أربع اربعات
مغرورة ومن عائلة مرموقة وتُدعى ( هَيَا )
ولا بْها مرض .. لكن نقاهة عن مشاكل هالحياة
وتدرون .. ما يحتاجون الغطوة ( بنات الاغنيا )
كأنهن حتى بشرع الله يجن مُستثنيات
أشي عيون ناعسة ، واشي شعر ، واشي ضيا
يالله دخيلك من ( هَيَا ) ورموشها المتثنيات
قابلتها في ( صالة المرضى ) وما كنا اخويا
لكن مجرّد نظرتين ٍ حايرات ٍعابرات
تناظر وتضحك وأنا جنبي صديقين اغبيا
قالو : يا حسره ما الله مملحنا بعيون البنات
وقمت اتميلح عندها رغم الوفا ، رغم الحيا
وسمعتها عشرين بيت ٍ كاملات ٍ وافيات
قالت لي : اسمع يا مؤدب ياللي مدري من أنت يا ..
بيني وبينك ليلة ٍ حمرا وغيره لا تحات
اثر الغلا في شرعهم مثل الدجل مثل الريا
يوم الغلا في شرعنا فيه المشاعر ساميات
الحب مع حضرة ( هَيَا ) ما يستسيغ الانقيا
وأنا اعرف إن الهوى لهفة وشوق وتضحيات
لا يا خلف لا تخذل أهالي الشمال ولا تغيا
ولا تضحك اهل العاصمة عليك واوقف في ثبات
وش عاد يا ( بنت الأكابر ) حتى حنّا أغنيا
وغنانا مصدره الوفا وانْ ما تغيرنا بنات