تخليد / يد - خليل الأحمد الشهري
ياعمي هالحزن طاهر ولكن صدري العربيد
عجزت استشرق غروبه وأعتّق للصبر خَمره
انا الفارع بأحزاني وخدي للمدامع بيد
أروض للعُلا خيلي واروض للسهر قَمره
مذاق الريح لو سيّل لعاب الصاريات الغيد
يهب شراع فتنتها على القابع ورى القُمرة
حبيبي والشعر هذا لألئ و الذوايق جيد
ولكن كيف اجملها ذوايق قادها زُمرة
إذا حلم الفتى يكتب شعور وما يخلّدإيد
انا حتى القلم ودي اخلِّد فالشعر عُمره
كتبت الشعر من دمي وحزني فالحنايا قيد
كسرت الصبح بعيونه وصاحوا ياولي أمره
محابر ماتبي تاخذ سوى صفحة ورى التمجيد
تبي من دونها تاخذ رماد وتترك الجمرة
إذا سرب الفكر فيهم تهاوى وانتهى للصيد
انا صيد الفكر فيني طفح بأنهار من غمره
اجي والشعر مايرضى يكون فحضرتي تقليد
يجي هذا النخل باسق ويشكر رحم هالتمرة..
ياعمي لو حَزن طُهرك وصدرك أصبح العربيد
تعال استغرب شروقه وقدّم للجهل خمرة