مشرق الأسياد - خليل الأحمد الشهري
صباح المجد لامنَّه تَنفس أخضرك يابلاد
صباح الهيل يااكرم بقاع الأرض واْطهرها
صباح الغيم لامنه تهجَّا مهجتك واْنقاد
لنورٍ يجهر المشرق ويبزغ وسط محجرها..
بلادي سارعي وحْنا عليك بهالضلوع نفاد
نرد احقاد من سوَّل له الشيطان يعبرها.
هنا الأعمار نرخصها بنادق والعيون زناد
هنا كل العدا تبلش تشوف رجال تقبرها.
نفادي دون ابو متعب سليل العز والأمجاد
زعيم لانتهض ترجف جبال الأرض وابحرها..
هلا بالمجد ياصقرٍ تعلى بالعرب واصطاد
حثالة همها تزرع فتن والخوف مسهرها..
هلا بأكرم ملوك الأرض زعيمٍ ماخلف الميعاد
كريم لاعطى..تغرق يدين الخلق باصغرها...
شجاعٍ مانثنى عزمه على دحم الجبال اعتاد
يزعزع لابغى بكتفه سفوح نجوم نخبرها..
اقول الشمس لكنه بلا مغرب يجي وقاد
اقول الغيث واتسأل عجب وشلون يغمرها..
بلادٍ من عطا غيثه تجود بصبحها لأعياد
بلادٍ من ندى كفَّه تناما كل أخضرها..
واْبو خالد على ذكره يزين المدح والإنشاد
يزين القاف في وصفه ويعجز قبل يحصرها.
يدينٍ تنبجس أنهُر سخاها راويٍ لااكباد
عزومٍ ماقدر غيره وهو بالباس يقدرها..
ولي العهد لو نذكر محاسن غيمك الرعاد
عجز حلق الوفاء يطري يمينك وانت تمطرها..
هلابك ياضيا هالصبح هلا يامشرق الأسياد
هلا ياسيدٍ يمناه تفوح بطيب عامرها..
هنا الحاضر يغنينا على لحن بنوه اجداد
هنا الماضي يرتبنا جيوشٍ لجل حاضرها..
بلادي والوغى حنا رجاله والسيوف حداد
بلادي والوفا فينا هقاوي حب نحضرها..
وطن ما يشبه موطن لأنك ياوطن أمجاد
بنينا في ذرى ترابك من الأجساد افخرها..
احبك واللمدى يشهد بأنك..في عيوني بلاد
تشيب العين ما تنكر عطاءك في نواظرها..
حفظك الله من عابث لانك قبلة الأشهاد
حفظك الله يابلادي دعاوي روح نجهرها..
لأنك يا وطن فينا سنا دين وسما واعياد
لأنك ياوطن اسمى بقاع الارض واطهرها