عسى السحاب - ذعار بن فواز السميري
عسى السحاب ليا نشا وادلهمّي
يسيل من نوّه بطن كل وادي
سيله يرجّع في البيار المجمّي
من عقب ماأصفا جمّهنه يعادي
كن الرعد منه القنابل ترمّي
صوته يصحّي من غفا بالرقادي
جعله على شبه الجزيره يعمّي
ماكفّته سلوى ليا اقصى الحمادي
وجعله على نجد المسمّى يسمّي
يجيب له من طاعة الله منادي
وليا اختلط عشب المسايل وزمّي
كن الفياض معطّره بالزبادي
يطيب كيف مونّسات الملمّي
سودٍ تنومس في نهار الزيادي
جرد الرقاب بوصفهنه ملمّي
نسع الغوارب والاذاني حدادي
ووضحٍ بكل اوصافهنه تكمّي
عزل الشيوخ منزحين المعادي
ليا جات مع درب البوادر تخمّي
بدرب القدوم تغز والجو هادي
في شوفها شفي وتفريج همّي
مع طاعة المعبود والرزق بادي
وأبعد عن اللي بالمجالس ينمّي
وضيفته جمع الحكا والدوادي
سوالفه مابين كذبٍ وذمّي
ويفكّر انه مع طريق الرشادي