نهار العيد
شفته نهار العيد يمشي بنفنوف
يخلف قلوب الرّكّع الساجديني

كن القمر في لبّة الزين موصوف
والخد برقٍ يقعد النائميني

العنق عنق الريم والبطن ملهوف
والثوب فوق الردف له طرقتيني

منوّلٍ قلبي عن الود مصروف
اصد واترك كل ما تشوف عيني

ومن عقب شفته صرت ياناس ملقوف
الله يعين اهل الهواء الصابريني

ماشفت انا مثله على كثر ماشوف
وكلٍ بعينه من يودّه يزيني

ليته من الاجناب ماهوب معروف
أظنّي اسلى عن هواء المنتحيني

لكن من قربه سكن داخل الجوف
وإله الضلوع الحدب سورٍ حصيني

خلّوه يسكن داخل الجوف مكلوف
يسكن بلاش ويزعل الحاسديني