من لام
من لام ياحسين من يتبع هوى ذوده
تراه ماسرّ احد قبله ولا ضرّه

مدري على حق والا النفس مقروده
يوم أنّي احب نجد وعاشقٍ برّه

في حبّها لو عطوني قصر فالسوده
رفضت كل العرض ياحسين بالمرّه

شفي ليا طاح رسمٍ يم ساموده
يازينهن مع خشوم طويق منجرّه

مرعابها يم جوّ الشيخ مرصوده
ومقياضها جفرة الصاقب مع البرّه

هذا هوى القلب وإمراده ومقصوده
أحسن من المدن في عيني مية مرّه

نقضي بها أيام والاعمار محدوده
والعلم عند الله اللي كوّن الذرّه