ياراكب حر تذرب سنامه
ياراكب(ن) حر(ن) تذرب سنامه
عليه ني(ن) راكب نيه العام

ماصك لحيه في ليالي فطامه
وعظمه قوي(ن) من لبن كل مرزام

الى ورد عد يطير حمامه
جا للصريمه من الحيه تقصام

تلفي لابن هادي كبير العمامه
شيخ ورمحه مع هل الخيل مرسام

مر(ن) يواعدنا بحرب وقوامه
ومر(ن) يجينا منه هرج التسلام

حي الكلام وحي منهو كلامه
اللي لفانا منه هرج التوهام

ويش الجزا ياشوق زاهي الوشامه
بالسابق اللي ماعرفنالها اوقام

اهديت لك نور السلف والجهامه
باغيك ذخر في مقاديم الايام

واصبحت انا وياك مثل النعامه
جاها بلاها من ثقيلات الاقدام

فأن كان تبغا سابقك والسلامه
خلو ظعاينكم مع العتش خرام

يحرم عليك النوط تطلق بلامه
مدام عندي واحد من ظنى يام

وان كان ربعك سيل نحا غمامه
ربعي زبار(ن) تشرب الما الى عام

ومعنا الطويل اللي يجيكم علامه
مثل العديم اللي على الجول صرام

الترك قبلك زارنا به زعامه
قد عافنا واختار عنا هل الشام

وان كان تنوي حدرتك بالجهامه
لما توصل لهل ذيك الارجام

في ديرة الحاكم كبير العمامه
اللي نحا عنها طوابير الاورام

قدامكم شيخ رفيع مقامه
والخيل توك وابيض الخد قدام

ومن رادها غيره ظربنا رثامه
وعود يحسب زلته بالتندام

مثل الدويش اللي يقدي الجهامه
عقرت جواده فوق رجله ولاقدام

وان كان تنوي وجهتك من تهامه
حنا لكم في مقطع الصلب قدام

اقبل وحنالك نسوي كرامه
شلف(ن) على شهب سريعات الاولام

تسعين رمح كسرت فالعدامه
عشرين منها بين راكان وحزام

كم ثار عند ركابنا من كتامه
ياما هلك من ظدنا من سبب يام

كم من حريب دارج الدم دامه
يشبع بها السرحان والطير لي حام

وكم سيف هندي فظخنا لجامه
بايماننا كنه مقابيس للاظلام

نروي من رقاب السكارى حيامه
في هية(ن) يشبع بها كل حوام

نطعن لعين اللي عريض سنامه
شقح(ن) مفاليها مباكير الاوسام

وان كان ودك عندنا لك كرامه
وتدري بظيفتنا لك الشرق والشام

أقبل علينا حي سوق المسامه
وعاداتنا نغلي سلب كل سوام

حريبنا تصبح بكبده ندامه
وبراية الله نجعله دون الاقدام

وصلاة ربي عد مانشى غمامه
على نبي خصه الله بالاكرام