خزاين المعنى - ريمية
العلم ما يفهق صغيره كبيره
والشوف ما فاد القلوب الضريره
من لا اشهدت له نجد ماهو بشاعر
ولا نجم ٍ الا نجم شبه الجزيره
وش جاب طشان القوافي والاوزان
لجمّ وعلوم البحور الغزيره
واللي مهو نجم ٍ باهل نجد ماله
حظٍ من الايام ولا طول سيِره
الجم جم ولا عطا الجال سره
ما يدرك الا الله وش في ضميره
ما كل من طرَّف من القاف يدرك
خزاين المعنى وخزن السريره
عسى ذخاير نجد ما ينحرمها
متولع اللايذ على هون غيره
يلوذ بالكايد عن الهون لا قال
متقصوي الاطراف مقصي خفيره
بي شاعره ما لدت لهزل معنى
وادوّر الجزلات لو هي عسيره
و مدوّر التصفيق يبشر بكثره
دايم جماهير الصفايق غفيره
لي لذة ٍ في قلب واحد معي حَسْ
إن القصيد يكود حلوه مريره
وان الحياة اللي سخيه لمجهول
محرومها راع العلوم الشهيره