فيه شاعرات - ريمية
ذولا الرجال يقال حصن ٍ مناكير
ماهم بحال كروش هي والكحيله
إن اقبلوا خلّو حياتك نواوير
وان ادبروا شاحوك من عند ذيله
دايم ضحاياهم بنات المناعير
كم شيخة ٍ حطو عليها خبيله
زيزومهم لو هو يقود الطوابير
عند الغنج وام الغنج بِرد حيله
لو انه ابو زيد والا انه الزير
لو خزته طفله غدا واحليله
لا لامح المهره يدوس المحاذير
ويروح عجه قاطب ٍ مع صهيله
وان جيتي بوجهه تجيك الاعاصير
ينسف على الراس المعاند شليله
راح الحصان وجعلها له مسافير
باكر يعوّد لك تباريه عيله
إما اشلعي وادعي بقلبه مسامير
والا اصبري صبر القلوب الهبيله
عَلك الرسن ما فاد قبلك غنادير
وكم بالعنان من الحراير ذليله
ممدي له القانون حدب ٍ مشاهير
ومع قوته يمده بكل خيله
فوضى وبالفوضى تضيع المعايير
ومن دنّع الغايه يهين الوسيله