تحية عطرها عود - زياد حجاب بن نحيت
تحية عطرها عود وبها شكر وثناء واعجاب
من أطيب ما نضمت من الكلام لطيب النية
رفيق شامخ مثل الجبل يوم الهضاب هضاب
يطول اللي يقول كلمته ما هيب مثنيه
رفيق(ن) ما فزع يرجي ثمن فزعه وشيك اتعاب
رصيده ضحكة حجاجه ليا جوه السنافيه
رفيق(ن) يوم ضيقني زماني واحتمى المشهاب
هو اللي ضمد الجرح وهو اللي برد الكيه
سطم يا حي ابو هاك الشنب لافتلة الاشناب
على رجال يوم أن العفون أهداف وهميّه
احيي يا سطم فيك الصراحة والحيا الجذاب
واحيي فيك نفس من مواقيد الكرم حيّه
واحيي عزمك وجزمك ووجه يعجب الاصحاب
واحيي ضحكة(ن) مرسومة(ن) ما هي صناعيّه
وانا حالف لا جمّل من تجمّل بي وانا ابو حجاب
لو امشي له وامشّي من شيوخ القوم جاهيّه
وانا ماني محارب في يدي سيف ومعي مشعاب
انا بالله قوي ولي يد(ن) ما هيب ملويّه
وانا ما همني لا قالوا عيون الرجال حراب
حراب ليا لقت جلد(ن) رهيف وفيه ماريه
والا يا بنت ياللي تشهرين من السيوف اهداب
عسى ما تصبحين بديره الانذال مرميه
عساك بديرة اللي يذبحون ويفتحون الباب
سناعيس الرجال اللي بوقت الحرب حربيه
وعسى منتي فريسه في يدين النذل والكذاب
وعساك اليا لفيتي يمهم تلفين طرقيه
وانا اللي كل ما شفتك ذكرت المنظر الخلاب
اقول الله ما اكبر حظ من كنتي بعد حيه
رصيده في بنوك المرجله حب وثناء واعجاب
الا في بنوك المال ماله شي موليه