غلطة قديمة - زياد حجاب بن نحيت

غلطة قديمة وانتهت لكن بقا الجرح العميق
اللي يبي يبقى على مر الليالي مالتئم

آسف لاني ماقدرت اصبر وغيرت الطريق
وآسف لاني ماقدرت افهَم اللي مافهم

بركت للحمل الثقيل وطقت لو ماكنت اطيق
من شان لاقالوا زياد يقال والله والنعم

لكن نعم مفعولها ماياصل يدين الغريق
اللي لمد ايديه للي مايطيقونه سئم

ولاعاد يسوى في عيونه لازفير ولاشهيق
شيئ يجي , تقفاه منه يقطعه لوهو نسم

مسرح جريمة قصتي اكثر غموض من الحريق
اللي تضيع به الدلائل والقرائن والتهم

مافيه امر من الصديق لياتنكر للصديق
ولافيه بالدنيا اهم من المهم الا الاهم

الياصرت بالحالك فريق وفيه قدامك فريق
وتخاف بكره لانهزمت يقال مسكين انهزم

خذلك طريق تظمن انه بالنهايه مايضيق
وان طعت شوري خذ طريق الله ترى مابه ندم

وانا استخرت الله وعيني خايلت قمة طويق
القمه اللي فوقها رفرف للامجاد العلم

والله لعانق راسها مادامني حر طليق
حر اليامنه شلع من سرعته مثل السهم

ماعادت احلامي على خبرك ترى خبرك عتيق
وان شفت بعيونك هرم , حلمي على راس الهرم

لي مده احلامي من العالي على الجزله تويق
صافحت كف المستحيل وقال : مد ام الشحم

انا برئ من اي حلم يلبس ثياب الرقيق
ان ما امتطى صهوة جواد العز بالله واعتصم

طموحي اخدم امتي وان مت يبقى اسمي عريق
قبلي فهد خادم لبيت الله وعبد الله خدم

اقسمت ما انسى واجبي واخترت لي درب يليق
وانا هنا والا هنا ما انسى انتمائي والقسم

مادام نيشان الفخر له في سماء صدري بريق
وشلون نيشان الولا اللي داخل القلب انرسم!!

جدي وابوي معاهدين الدين بالعهد الوثيق
وانا على نفس الطريق اقسمت والوضع انحسم..!!