الا ياالله - سعد بن جدلان الاكلبي

الا ياالله ياللي تحت هيبة سلطنتك اسلمت
لك المسلم يسبح لك بحمدك ولك الاسلامي

احمدك واشكرك واثني عليك بما علي انعمت
تزودني وفا قدر العشير ووصل الارحامي

ولجك الفجر ياليل الذهول اللي علي اضلمت
بعرضك واقع الماضي بعيني عرض الافلامي

ولهتك يالنديم اللي على صافي وفاك اضرمت
بصفحة ذكريات العام واللي من ورا العامي

بعد تقرير مشوار التجارب نجحك واجزمت
بان السيف سيفي والعصا والمحزم احزامي

عطتني عزلة اخلاصي معك نسيان من نادمت
كتبتك وانطوت صحفي عليك و جفت اقلامي

اباهي لا ابالي واتبيسط كل ماقدمت
اشب النار قدام العرب واشيد اخيامي

نهاري حر شمسه يستحي منها لسان الشمت
وليلي ترقب نجومه ملامة كل من لامي

على ضو الكلام اللي كشف عنا ستار الصمت
عرفت اني تحت برق الامل في روض الاحلامي

احسب انك تيمم با اتجاهي وين ما يممت
واثر ما انت بورايه في الطريق ولانت قدامي

مصيبه لاتدنت قيمتك في عين من قيمت
يشوفك بالسهل وانته تشوفه بالسما السامي

كثر ماحن قلبي للونيس وكثر ما درهمت
فجر صدري حنيني واتعب الاقدام درهامي

عيون الصد وعيون التجافي حول مهما اكرمت
تشوف المجتهد كسلان والبناي هدامي

مدام ان جانبك شام لجنابي وانت عني شمت
كثر خيرك وانا مانيب لاجايع ولاضامي

اشوف انه علي واجب ليا مريتكم سلمت
مرور اكرام تربطه الكرامه عند الاكرامي

على شان الخفوق اللي على عرشه قعدت وقمت
حجب عنك الدجى لين اشرقت لك بيض الايامي

ختام السالفه ياطيب العشره كرمت ودمت
هذا حقك علي وحق شرهاتي على اوهامي

مصير الوقت يشرح لك دروسه وان غفلت ونمت
يصحيك الزمان اللي يصحي كل من نامي

تذكرني ليامن خابت اوهامك فمن وهمت
وشفت الفرق في حب الخشوم وحب الاقدامي