موكب التأبين - سعد زهير الشمراني

بعيني شفتك البارح على هودج فرح محمول
أو إنه موكب التأبين مدري وش تهيا لي

سألت العابرين اش صار كلن قال أنا مشغول
نضب نبع السؤال المر وآثرت أسكت أحلى لي

رحلت وقلت ليه أرحل وأنا أعرف رحلة المجهول
مصير الغربه إن طالت تجردني من ظلالي

ولكنك رحلتي ماتركتي للنجاة حلول
وضيعتي مفاتيح النهار بصحصح خالي

رحلتي مثل ماترحل صباحات الحياه فلول
رحلتي ياصباحاتي وخليتيني لحالي

أشاهد ثكنة الاصحاب ووجيه البشر مدهول
أحد يضحك وأحد يبكي و أحد يشفق على حالي

كسرتي خاطر الشاعر وراح بخاطر معلول
على غيمة معاناته يشل الطرق ويلالي

حمى سوق القتال وطاح فارس عزوتك مقتول
همى وبل النبال وضاع بين إيديك قتالي

رحلتي يافتاة الحزن والدنيا سفر ونزول
ومادام الرحيل أقوى فأنا أقول الله أقوى لي

على فكره بقى في داخلي كلمه لها مدلول
بغيت أقولها لك بس راحت من على بالي

بغيت أقول لكني نسيت إلا بغيت أقول
بغيت أقول لك مبروك ياحلوه وعقبالي!