الذنب - شايع العيافي

استعادة فكر واضغاث وحقايق
وانبعاث الذنب من عقب اندثاره

مشعل البارح على قلبي يوايق
حل في حدب الضلوع وشب ناره

هودي ياجمرة الساري دقايق
لين اسوي لآخر المله مناره

خاف يلحقني من الحسره لحايق
يمتلي ثوبي غضب واقطع زراره

والله انه ساقني للشك سايق
والظنون الهوج مذكية الشراره

لاتقريني ولاتكتب وثايق
مابقى الا ركعتين الاستخاره

الرجال رجال ماتصلح علايق
لاتلف السالفه لفت صقاره

انت لاطاعم حيا ولاانت ذايق
قوتك الحنظل ومشروبك مراره

رحمة الله يالسوابيح الطلايق
ساعة منها على متنك خساره

ايتبرا منك حسنك ويتضايق
فاقد من ليلة البارح وقاره

والله انه شافعك بين الخلايق
لين وطيته على متن الخباره

لاتريق المجد ما للمجد حايق
انحلال الذات وادمان الدعاره

كل مذهب غير بيع العز لايق
خذ معك عبره من اطفال الحجاره