الجدي والا اليماني - شايع العيافي

استغفر الله كان انا منك مذنوب
ياوجه حظي .....! والبلا من زماني

دنيا تواعدني مواعيد عرقوب
فيها تساوت سيتي والحساني

كني على خشم التوافيق مضروب
العشر منها ماتطلع ثماني

وماقدر الله للمخاليق مكتوب
وانا قنعت بحظي اللي عطاني

ولاني على درب المدانيع مغصوب
اما نحرت الجدي والا اليماني

حدبا الظهر سجات وفجوج ودروب
يسعى بها المبلي وتاليه فاني

اما نقض فتل الزمن وادبح النوب
والا بهمه والله المستعاني

شفنا وعفنا من ورى صبر ايوب
وانا معي حجه وشاهد عياني

منحي من العالم ودربي على صوب
يا من يداعيني ويفلج لساني

اما تبين للرجاجيل عذروب
ولا رسمنا الوسم بين الأذاني

مايستر المخلوق خام من الثوب
لابد تكشف سيرة القلباني

متن المحردب فيه للعين حردوب
وللبغض في طبع المعادي معاني

ازوال......!! فيها تنظر العين وتروب
رب بلاها بالمرض مابلاني

معرض وجاني محمل ابليس مقلوب
وابليس ضلعه لأعوج الدرب حاني