النجم الصناعي - شايع العيافي
نودٍ يزايف سحابه والمدى بارق ورعاد
ليله غضب والصباح انزاح ماجاله شعاعي
تنثر علي الحسايف يا شهر شعبان وجماد
واصوم من لوعتي صوم الفطيم من الرضاعي
يا صاحبي لاتسل عني ..وانا ماجيت نشاد
راسي وبارت به الدنيا وخلاني ذراعي
الغدر والطعن والمسرى بجرح كل مازاد
لجت ضلوعي ولا حتني مراقيب التلاعي
باب على الوصل والآخر عزا ونياح وحداد
محروم والعيس مرت بي على بير السباعي
البسمله والعياذ من الخطا يا أمة الضاد
ماسرت القدس والضفه وسكان القطاعي
اسمي مهجر ونازح لو سكنت بلاد وبلاد
عيني لبسها النزوح ولبسته من غير داعي
دارت وجارت دواليب الدهر يامسك ياكاد
ماعاد تشرا على سوق العطور ولا تباعي
انكان مالله كتب لي معك في جنتك مقعاد
والله لا سير على قلبك واسولف بالتياعي
لاعاد ليل جذبني لك وجيتك غصب لاعاد
لا والله الا تغير فيك ظني وانطباعي
ان كان خذت الغلا وانك نسيت الملح والزاد
انشهد اني غويت الدرب يالنجم الصناعي
عمسات الاريا تواعدني واضيع كل ميعاد
واضيق بخطاي وتضيق المناهيج الوساعي
اذكرك واذكر نعيمك والجحيم قيود واصفاد
وافرك عليك الكفوف من اللقا لين الوداعي
قبل امس للكلمه العذبه معك مصدر وميراد
واليوم لجت طيور الشوق وارهقها ضياعي
عطيتك الروح يا وجه الرضا والوصل منقاد
الله يسامحك وش سويت في مدي وصاعي
مالي عن اللي شربته من كفوف الغدر محواد
حملك على القلب زاد وشل مالا يستطاعي
يا سيدي لاسريت الليل الاسود شوق وسهاد
مالي من الارض واللي فوقها غيرك متاعي
اقلط على مابقى لي من غلا في تالي الماد
واقول لاباس يادرب خذا شبري وباعي
منهي ومامور وامسي مثل يومي حرب وجهاد
اجحدك وآصد وارجع منكسر وامرك مطاعي
ظلمك وصدك وردك بيدتني والغلا ساد
قامت تساقا مع دمي مثل سم الأفاعي
اقبلت يا موعد البارح تمنيني بالاعياد
واقفيت مثل السفين اللي تولاه الشراعي
القلب هجري وطلات العيون السود ميلاد
رعية مالها غير الوداع المر راعي
فقط رضيت وقنعت وجزت ...يا.. تلعات الاجياد
ماعاد عقب اصبح الغره جدال ولا نزاعي