بلاوي - شايع العيافي

رحمك الله ياراسي تواضعك الحشيم أغناك
ولاروس يزاومها الكبر و الزيف كاسيها

منابر ماوراها الا طبول ولابها شرواك
ياحرفي وقلمك تبدي له الكلمه مواريها

تمايل له كما نسمة عبير ولينن من راك
وتسجد له على كف الرضا وتمد ايآديها

تحلل له مفاتنها الا من حل به دكاك
ويرسمها على كل المسامع لين توحيها

من الحكمه ومن جرح الزمان ودورة الأفلاك
الى زلة رفيق لو نسى مانيب ناسيها

نعم يالجاوي الأزرق الى كاد العرب مشراك
تفاصيلك ذهب والجمره الحمراء حراويها

نعم يايسرنا الغالي ومشروهي على ذولاك
الاعسرت عليهم غايتي من عسر راعيها

تسيدنا ولاسدنا عبث لاوالذي سواك
لنا اولها بكل الفخر واوسطها وتاليها

تعلمنا وعلمنا صدور تشكي التكاك
ولازدنا جهل والناس سابقت طواريها

ثقه بالنفس والعاقل عليه العرف والأدراك
قبل ينطق بكلمه ضايعه لازم يقديها

اجل وشعاد اسمي حضرتك ياحضرة الشكاك
وبك عله تعصت والأطباء ماتداويها

غدا البرواز مثل البيت لاطاقه ولاشباك
وعذر اللي بغى كحلة نظر والحق معميها

عليك الهون لين العلم يطلع ويهبا مسعاك
ولالك قسم غير التاليه لاصرت راعيها

تهزع لك براس ماتروس غير في علباك
وتاطا من غرورك جرة المسلم وتخطيها

ولك عين كبيره وابتسامة ضعف في شرماك
تدور للعشاء وام المخالب من يعشيها

بلاوي والبلاوي كلها تصغر تحت بلواك
من اطراف الحديث تدور الكيه وتكويها

على جنبك بعد ذنبك ولا تجلس على مركاك
وعاتب زيلتك سبحان مجريها ومرسيها

زمنا ماله الا الثوب والباقي على الأبواك
ولمعه كاذبه وازوال تمشي والبلا فيها

علي آمرك بالمسجد لعل ابليس ماينهاك
صلاة للجماعه كل ماحلت تصليها

غدا الموضوع مغلق واذن المذن على الأمساك
لك اللهم انا صايم عن اولها وتاليها