الهرش - شايع العيافي
لجت رعود الوقت والبرق لاحي
واوحيت صوتٍ من ورى سيف جده
صوتٍ يقيدني ويطلق سراحي
واعطيه من بحر الهواجيس قده
بحر يضيّع بهجتي وانشراحي
فيه الروابع بالعنى مستجده
الى متى والطيب يكسر جناحي
وفي كل يمه لي من الحظ صده
الى متى والناس تنكث جراحي
وان طبت يوم ازايم الهم مده
ياهيه ياللي سقتني بالصياحي
يموت هذا الراس ماباح سده
اللي ورى قلبي بعيد المناحي
واللي على وجهي بشير الموده
كانك على الجره تدور مطاحي
بكره يجيلك عن مباغيك رده
الله خلقني والتعفف سناحي
لو جات غفلات الليالي بشده
من مد كفه والعطايا شحاحي
يبلغ عتي العمر ماشاف مده
تمره ايامه مجيّ ومراحي
مثل الأسير اللي قيوده تضده
يقبل وتقفيبه هبوب الرياحي
ورى سراب آماله المجرهده
وانا تركت الليل وارجي صباحي
ويومٍ مثل ليلي عسى الله يلده
الله عطاني من فضاه الفساحي
عسى العوض في يوم الأحزان غده
اما طعنت ونجدتي من سلاحي
ولا زويت ايدي ومضّيت حده
هرج العرب واجد ولالي صلاحي
ياما بهر شوفي.. ولكن لابده
ماكل طيرن من طيور الفلاحي
كم طير وكرن ماينومس مهده
دور على غيري بكل النواحي
وانا بدور لي فراش ومخده
اشرب على لاماك سمٍ ذحاحي
واصد واخذ شدةٍ عقب شده
غديت باشه في زمن الأنفتاحي
ولا انت هرشٍ لا رغى عض بده