الله الله - شايع العيافي
اثبتي لابارك الله في جزوع دق زوره
ياهجوسي مالضيقات الليال الا هواوي
ليلة عيا عليها الصبح واستبخل بنوره
والضمير الحي يلوي به من الضيقات لاوي
من بعدها ياقصيدي اثبته واثبت حضوره
شاعر لاصكت اليمنى على اليسرى رهاوي
كل روض من رياض الشعر يقطف من زهوره
يثني القد الرشيق ويكسر الطرف الحياوي
الله الله والزمان الصلف يشعبني بجوره
كل ماسند تحدر كنه السيل النحاوي
انتقض فتلي وفتل الهم وثق بي سيوره
عاقني عوق الكسير اللي تمثنته الاهاوي
ماكر العشّاق يدعيني على هجرة طيوره
يومي الملواح للطرقي على الدو الخلاوي
يالله الخيره غدينا والوفا بين قصوره
صكت نصوب السحاب وغبت يالنجم السماوي
انت راس المال في عرض السما والعمر دوره
مع مطاليعك يمد الحال فالوقت الغناوي
اسمع ..اسمع.. واترك العذال لاتصغي لشوره
والله اني كايد المنوه على اصحاب المناوي
جابني لك حظي اللي ماتخلص من دبوره
الشبك لأسمك وقسمك .. والشريكه للنداوي
ايه احبك...! ايه احبك..!معك صوت ومعك صوره
واطي جرتك مدري ويشك لمشهور ناوي
ابلج المفرع مضرا فيك للثوار ثوره
سلهمت عينك تعزويها كبيرات العزاوي
الغلا قسمك وحنا كل ما هاجت بحوره
مالت البسام بالهامه على البشت الحساوي
لد عينك يبدي الخفّاق وتحول سبوره
من مراقيب الضلوع اللي على وكره حناوي
خلها تغضي لعاشقها ويرزح في ثبوره
وقعها وقع الخطوب ويا مجير من البلاوي
وان قريت الفاتحه "وآمين"عن تسعين سوره
جعل مايبقى عليه ماتثبته الفتاوي
يا بلاد اخوان مريم... يابلاد اخوان نوره
طاح ابوزيد الهلالي بس ماطاح متساوي
وان حصل للعلم رد وجاء لدم الحر فوره
ماتعوض في جمال البدو وشياه الشواوي