الهدره - شايع العيافي
أيست من وضع الهدير اللي يعود للرغا
والعاديات أرخت الأعنه واقبلت بوفودها
بعد عن السجه وضيقات تنول المبتغى
ألتاع من بيض الليالي واكتوي من سودها
صوت يسولف بالولع وآخر تقاسيمه لغى
يطرح علي النبره اللي ماتليق ردودها
تبت يدا من علمك يا قلب تتبع مابغى
حتى رمتني عشقتك باصفادها وقيودها
أهوى نجم غيره ونجمه في سما الروح بزغا
بزغة جبين الصبح لاجات الليال حدودها
يا نسل هامات الزحول ومارثة فرز الوغا
حجتك تفلجني بدون قضاتها وشهودها
ظلمت واطغاك الدلال اللي على روحي طغى
تلحق مدى نفسي وتبدي من قصاك سدودها
رسخت في ذهن الهوى واللي ماهوب انت أنلغى
وامست عيال ابليس تبني من سببك حقودها
يا كافي المسلم من الغيبه وزهفات البغا
عذني وأجرني من عباد سمها بكبودها
عشرين حاسد واربعه عدوان والخامس ثغا
شق بستر الغيب والفتنه يدخّن عودها
همزه ولمزه في عباد الله سواة الببغا
هذي ينقصها وهذي لو شوي يزودها
وانا اللي استاهل هدرت وراعي الهدره رغا
غلطة عمر وانا حلفت اني ماعاد اعودها