الحلم - شايع العيافي

سفاح يا مكسر الجاوي ..* ..ويانسل الحلاحيل
شجاعتي مرها ضيم المناعير وهزمها

اقبل زمانٍ يعز التبع ويذل الرجاجيل
تعذر عليه الذيابه واتّعشا من لحمها

العام للجيش ركابه وللسبّق محاميل
واليوم للروس وصمة عار ..مدري من وصمها

طاحوا كبار العمايم في صغيرات المحابيل
لحيه تحسن.*. ولحيه حشّم الله من حشمها

لاقبلها في حديث احمد ولا فالذكر تنزيل
ولابعدها مغصب شاف المعاليق ووسمها

خلوني اغيب : لو ساعه قبل لايطفح الكيل
انا من العالم اللي خلّته محدٍ رحمها

لبيه ياشرهة العنقا.*.لو اني شاكي الميل
طويلة العنق : ياسفاح وش سبة ندمها

لي بالغلا حالةٍ ترثى.. وفي حالي دواليل
وأتلا هزايع غلاها .. عبرتي يوم ألتهمها

احبها حب من خاشر من الحب المهابيل
واقصر سهم عيني من النوم واوفي سهمها

انشهد انها قصتني .. والعزا ماهوب بالحيل
ويلي على قربها لو سرحتني في غنمها

حلمت والحلم للعشّاق لذات وغرابيل
واصخى وفوق المفارق.. فالكرا تطرح كرمها

البارحه مرت الشيخه ولدت بالمظاليل
لعلني ما تبدل شوفها ولا اعدمها

كني بها يوم جات..ولا تسل عن باقي الليل
ماغير صب يقبل فالثرى ماطا قدمها

اقبل بها الحظ .. واستدنى المقافي للمقابيل
حتى ..تسقويت مبسمها وعطرني نسمها

منجومةٍ في مصبحها يطل الجدي وسهيل
يضويه ليل الدجا .. وتزيح ليله بمعصمها

انقضّت بعودها الريان..مسبوك التعازيل
لعاب لا رويته عيني ولا عدى ضرمها

خدرية السلهمه في سودها بين ومواصيل
وان لجلجت لاح براق السحابه واقتسمها

اضغاث الأحلام سمتني ولا للحلم تاويل
ارسومها مرها صبح المشاريق وهدمها

سفاح يا فزعتي صاحبك وشفوفي مغاليل
والكلمه الطيبه لابدها تقضي عشمها

سلم عليها وعلمها ترا ماعاد بي حيل
نفسي تراكنتها صرام الأرواح وصرمها

اما تعود معاويد المطر لأستكبر السيل
والا صلاةٍ على روحي .. وتدفن في حرمها