المسرى - شايع العيافي

اليا دعيتك ياسبيل الخطا عي
واجزم على المسرا وحسّب نجومه

لابد مايطري على خاطرك شي
وتحطني مابين جفنك ونومه

يصخي بسكرات الكرا حاتم الطي
ويغيب في دمعه وتكثر همومه

قسمه من الأيام شيات وشوي
قلت تدابيره ...وبادت عزومه

يبل ريقه لال بعده عن المي
ساعه ..وميعاد الحبايب يلومه

والله ماغر الغلا بس..! هي هي
خلتني ونفسي عليها بحومه

مري عليها يا " هيا " يابعد حي
واحكي لها بالوصل قعده وقومه

راحت وخلتني على مرقب الغي
طير الهوى يكسر لها كل حومه

هي كية الميسم وهي ميسم الكي
مافيه ضلع الا جزع من وسومه

لامثلها عندي ولا زيها زي
اسمع نباها وآخذ الموت هومه

بنت الغرام ومنهل الشمس والفي
جاه الزمان العف...وجه النعومه

الفاتنه ماغيرها فتنة لي
دانة سنين العمر واجمل حلومه

يا حض يامنحوس في زامر الحي
اما ذهاب الشر والا قدومه

الشوف مايقنع من النور والضي
عسى نهار البعد يومي ويومه

ومادام عاده حي وانا بعد حي
والله ما ينسى ولا انسى علومه