القليصه - شايع العيافي

يوم اعتمت الأظلام والنور غابي
والنجم في سبره تجاذا بصيصه

حثيت رجلي في مهف الغرابي
حتى وطيت الداب ذابح قريصه

من نابه ادميت اصبعي تحت نابي
وصوتي تغرغربه عظام الفريصه

ذنبي لعله ماينقص ثوابي
خذيت لي من ضد روحي خصيصه

عي يعاييني على كثر مابي
ويشل همي في مخابي قميصه

يرخي سموعه في لغى كل هابي
والناسٍ في جرح المشاعر حريصه

يمرني ويقولها مادرابي
وانا مانيب ارضى لنفسي نغيصه

لاوالذي حطه عناي وعذابي
الرخص من حظ الوجيه الرخيصه

اهل الجروم اللي تضد الثيابي
تباعة المقفي .. سواة القليصه

اطيبهم اللي في السوالف مرابي
وان وجّبت مثل الثعالب محيصه

اكبر من الحره.. جنوب وعلابي
وان جاع قرط فابن عمه خليصه

لاطارقٍ بابه ولاطق بابي
وفي الحق ماني خارصٍ لي خريصه

انا على الرفقه وديع الركابي
معلاق من بانت عليه النقيصه

فان كان مداتي ورزقي هبابي
قصيت من كفي لكفي قصيصه