أوّاه - شايع العيافي

أوّاه يا سبر القنوص المتفّق
وش جبت جعلك ماتجيب القلاعه

عرضتني مرمى رصاص المطفّق
وانا دخيل حماك مثل الوداعه

ما شفت حومات الضماير تصفّق
عن غيرك وصوبك تسوق الطماعه

جاك الغلا بين الضلوع وتدفّق
كبر وصل من آخر الليل ساعه

وارقد وخل عيون شايع تشفّق
وصل الحبايب في زمان القطاعه

أليم عزوم الوهن واتلفّق
مثل اليتيم .. اللي محاضيه باعه

هذا وانا لا قفيت روحي تخفّق
ماكل مبلي نجدته من ذراعه

ليتك بعد ماسرفت فيها ترفّق
عيني على عينك تسوق الشفاعه

ولا لعلك فالزمن ماتوفق
وارفع معي لله كفوف الضراعه