بياع الغرام - شايع العيافي
تجلى عن عيوني حابس المعنى وطاروقه
ودنيت القلم للبوك يملا كل خاناته
بنات الفكر تمن خاطر المجروح وتبوقه
مرابيها سواد الليل تنهب كل ساعاته
عيون عافت الممسا وجوف يتقد شوقه
وقلب كن جيعان السباع تجر وناته
تصرم به معاليق تضخ الدم بعروقه
على حالة نزيف ويختلط دمه وعبراته
وانا اللي عارف جرحي وانا اللي باخص عوقه
ولا يلحق حد غيري مناقيده وشرهاته
انا اللي جيت بياع الغرام ودجت في سوقه
الين انه كواني والحق المكوى بعرقاته
الا ياعين حر ينتق الصقار بسبوقه
تنادى له مباريق الدواغر حل هداته
ولاياجيد ريمي توحى الرمي من فوقه
خذاه الخوف واستنكر مفاهيقه ووقفاته
ولا يافاضح الليل الظليم وحزة شروقه
مطاليع الجبين اليا تجلى فوق حجاته
حبلي والحبايل في عجاريفه ومنطوقه
الين انه مسكني مثلمسكات العمى شاته
نعم ياصاحب معه الهوى يومي بذالوقه
ولاني والرجا مابين حسناته وسياته
عليك القلب من بعد الغياب يوسع فتوقه
تولاه الزمان ومكنت به كل صكاته
عسى وبل السحاب يجض رعاده من بروقه
وينثر من حشاه الغيث ويشقق مصراته
على ديرة ربيع النفس ملك القلب وحقوقه
غزال يطلع في سد معشوقه وغراته
تربى في ذرا شيخ يقود العز ويسوقه
يعلمه الترف واصبح تقاليده وعاداته