أمانة - ضحوي الأسلمي
أمانه لاتوادعني حبيبي .. لانويت تروح
دخيلك خلنّي وإرحلْ .. كذا من دون ماأدري
دخيلك لاتعلمني كفى صدر الغرام جروح
وأنا اللي من عرفتك .. وأنت متربع على صدري
بنيتك بالحشا .. قصر رفيع وشامخ بصروح
وقلت : إسكن هنا ياللي عيونك سودها قصري
رخصت أغلا القصيد وكل ماينزف صدوق البوح
وجيتك والغلا طفل .. ربى بالجوف من صغري
تحملت العذاب وصرت أنا من سبتك مذبوح
صبرت .. وطال صبري .. لين مل الصبر من صبري
أبي بس أظفر بقلبك مدام الشوق لك مفضوح
ومدامك بالعروق اللي تحبك دايم تجري
أبي عطر الهوى منك حبيبي كل يوم .. يفوح
وبعلنها على الدنيا : ( أحبك يابعد عمري )
حبيبي أنت ماغيرك حبيب قد سكن بالروح
ومن فكّر يجي بعدك ترا بقول له : بدري ..!!
تخيل كل ماتسألْ .. بنبرة صوتك المبحوح!!
( حبيبي لو تكرم بسألك : إشْ رايك بعطري !! )
أذوب ويعترف قلبي .. ياعم العطر .. يالمملوح
بأنك تغري وعطرك مثل سحرك بعد يغري
وتخيل من كثر حبك بقول لحضرتك مسموح ..!!
قبل حتى الخطا منك يجي وتقول : خذ عذري
بقول لحضرتك فدوه ترا كل الخطا مدموح
ماغير أكبر خطا لامن .. نويت الجد في هجري
كفايه باب خفاقي عشْقك وصار لك .. مفتوح
وكفايه لو تغيب شوي .. أضيق وينشغل فكري
أمانه .. لاتعلمني حبيبي لانويت تروح ..!!
دخيلك خلني وأرحل .. كذا من دون ماأدري ..!!