شمالي - ضحوي الأسلمي
أبعلن للملا حالي معك وإن كان ماودك
أنا في ذمتي مليت أجيلك وأطلب وصالك
عسى لايكون تحسبني أخذت العهد مااهدك..!!
ترا مابيننا عهد يقول إني أببقالك
عسى وقت لفابك يبعدك عني ولايردك
وعسى طيب المقام بغيبتي بالدمع يهنالك
وعسى لادارت الايام تحط إيدك على خدك
تلوم الكبر في طبعك وتبكي كيف سوالك..!!
ابيك تشوف من أمسي عذاب يسعد بغدك
ابيك تصير وحداني.. ونيسك ماضي أفعالك
كثر ماذقت من نارك.. أبيك تذوق في يدك
وتشرب من غضب حالي قراطيع بتحلالك
بفز.. واطرب.. وافرح.. الى من الزمن عدك
مجرد مصلحه.. والمصلحه مثلك واشكالك
الا ياصغر تفكيرك تحسْب انك محد قدك
خذاك لعالم عنادك غرور بان بأقوالك
أبد مااموت في موج تصفّق في بحرمدك
ولايمكن قصيدي يخضع لحبك ويرسالك
أنا لامن تركتك.. اتركك واطوي بعد سدك
ابيعك بأرخص السلعات وخل الهرج في بالك ؟؟؟
حرام اترجى ترجع لي وطعناتي سبب صدك
مادام إنك تبي بعدي!!.. حشا مااجيك واعنالك
شمالي والشمالي لاطنا ياويل ابو جدك
الا ياويل صداتك الى من الطنا جالك..؟؟
وضلعي شمّري لامن زعل تاقف على حدك
يمسّّح فيك يكتبّّك حروف الذل لأمثالك
رح الله لايردك وأبشر بقلب غدا ضدك
ترا من جد مليتك ولابي تالي وصالك