راعي مصالح - ضحوي الأسلمي
ماني على ماقيل .. ( راعي مصالح )
ولاني من اللي .. فعله .. يخالف القول
أنا من اللي .. بالمواقيف .. رابح
هزيت ناس.. ولا حد هز لي طول
وجهي عليه من الطناخه .. ملامح
وإسمي مع قروم الرجاجيل .. مشمول
بالمزح تلقاني .. مرّوق .. ومازح
وبالضيق صبار .. ولااقول لا أحوول
ضد الغلط أحيان .. أدمح .. وأسامح
وأحيان (( أخربه ))..ولاتنفع حلول!!
شعري مترجمني .. ولانيب .. شارح
معناي واضح نوب .. ونوبات .. مجهول
أكبر عيوبي .. ميلتي .. للمصارح
لو بالصراحه عكس.. ماكان مأمول
واللي تحداني.. ولاصار .. جانح
مخبل/و مضيّع / وغادي /و مهبول
أقسم قسم .. بالذل .. ليصير سابح
وإن كان فأمه خير .. يبرهن وش يقول ..!!
نفسي .. وعارفها .. ولاجيت مادح
والقلب بابه .. للكِبر .. دوم مقفول
للطيب فيني عشق .. نبض .. وجوارح
وإحساس روحي للصخا .. فيه .. مدلول
والشهره اللي كل أبوها .. مصالح
أنا .. غني عنها .. ب( ربعي ) .. على طوول