خذ عيوني - ضحوي الأسلمي
حبيبي كان شعري ماقدر يرسم غرامك كيف..؟؟
أبلعن جد أبو شعري الين يصير رسامك
وبنثر لك قصيد من حشايه مْلفه تأليف
وبنزف لك شعورٍ كم صحى فيك ورجع نامك
حبيبي تستحي منك بحور الشعر بالتوصيف
كملت وكمّلك رب خْلقك وزيّن إتمامك
خذ عيوني لبحر عيونك الثنتين خذها.. ِسيف
وخذ الخافق ودقاته فدا في مقبل أيامك
وخذ من قلبي الهايم فناجيل الغلا والكيف
وخذ من ضحكتي وإترك لي أحزانك مع الآمك
أبيك ولو غدا وصلك صعيب وصار به تكليف
أبطعن لحظة الفرقا وأعادي جملة أخصامك
وإذا كان الزمن قاسي تراني للزمن كالسيف
ابذبح ساعة تكره معايه لحظة المامك
مدامك إنك تقول ان المحبه زادتك تشريف
اجل والله يشرفني هيامي يسكن هيامك
احبك كلمةٍ لاجلك ابد ماحاشها التزييف
احبك واتذكر جلستك … عطرك…وهندامك
دلالك ضحكتك شعرك وتسريحه مع التصفيف
كلامك ذوقك وسحرك دلْعك .. ولفة لثامك
غنْجك وشيلتك .. واللي تخفى ما بعد قد شيف
رموشك ه يارموشك..!! ومحلا الموت باإسهامك
احبك كثر مابين الخليج وبين حد جنيف
وكثر ماضم صدرك ياحبيبي روعة انسامك
احبك ايه احبك..!! وإنْ لفابك حلم والا طيف
احبه واتمنى لو يجيك الحب باأحلامك
أحبك إيه أحبك..!! يادفا البرد وبراد الصيف
أحبك بس قلي وش تبي..؟؟ ويصير قدامك
تراك بذمتي بأقصى الضلوع الحدب كنك ضيف
على ماودك امرني .. تراني صرت خدامك