يامطوّل الغيبة : هلا - ضحوي الأسلمي
هلا يامطول الغيبه .. مثل ماقال : ابو نوره
( هلا يامطول الغيبه .. من قليبي أهلي به )
هلابك والقصيد اللي بكالك فزت .. بحوره
وانا مثله برحب بك .. هلا بك كثر ترتيبه
قبل عامين ياقسوة زماني .. ياكبر جوره
عطاني .. ماعطا .. غير الطعون وشف مضاريبه
قبل عامين ودعتك .. بنفس حيل مكسوره
مشيت وأثرك بدمي .. توقف به وتمشي به
قبل عامين ولروحي صرخت وقلت : ماجوره
حبيبك فارقك ..والقلب عساه يهون تعذيبه
ماغير اتخيلك واطلق عناني .. وارسمك صوره
واقول الله يجيب اللي تركني الله .. يجيبه
غدا غيابي مع العالم .. غياب مثله حضوره
وحيد ووضعي المزري ولااحد جا .. يواسيبه
ونشف دمعي ولاباقي دموع فيك .. محجوره
وكم صدرى تنهّد بك .. وكم مره عوى ذيبه
كأن همومي بحدب الضلوع العوج .. مسموره
وكأن ( أبو السهر ) ضيف .. وأنا عيوني معازيبه
وأنا ياما ترجيت الغياب .. تهاجر طيوره
تروح وترجع بلحظه .. وأقوم أصارع الخيبه
وانا والله من صغري .. ونفسي فيك ماموره
صدقت وسقت لك قلب يحبك .. وأكثره طيبه
وأنا طبعي مثل ربعي .. وعهدى مااهدم جسوره
وأذا قلت العهد يعني .. اوفي به اوفي به
حبيبي كيف أبنسى والهوى لك باني قصوره ..؟؟
بجوفي .. وأكثر وأكثر مخفي لك .. بخافي به
حبيبي جيت والدنيا غدت من جيت .. ممطوره
رويت ارض الخفوق اللي .. تصبح به وتمسي به
لك الله ماحد غيرك شعوري هام لشعوره
ولايمكن يجي غيرك .. وغيرك ويش انا ابيبه
أبهديك القصايد كل أبوها عشق .. منثوره
وأبطفي بك جمر بعدك .. وأببعد عن لواهيبه
وأبضحك وإطرد احزاني .. وأرجّع مافنى دوره
وأعيشك واقع يقطع .. جذور الشك والريبه
وأبجمع كل أبو جد الغرام وأسكب عطوره
وأرش الكون بحضورك .. ( ياعم الملح والهيبه )
وانا شاعر وكل شاعر يبي يكتب لجمهوره
وأنا جمهوري عيونك مدام عيونك ..مصيبه !!
وإذا شفت القصايد في ( فواصل ) يوم منشوره
تراها بس من حبك ..أبي أرضي مطاليبه
هلا بك والهوى جيش .. وقف لك كل طابوره
يغني بس لرجوعك .. وانا مثله بغني به
بغني به وأغني لك .. مثل ماقال ابو نوره
هلا يامطول الغيبه .. هلا يامطول الغيبه