أحبك زيادة - ضحوي الأسلمي

خذها عهد ياللي تشك بغرامي
من شان تدري كيف أحبك .. زياده ..!!

والله قبل الموت .. لإثبت كلامي
لأقول : (أحبك ) .. قبل نطق الشهاده

بس إنتظر !! .. وتشوف كيف إلتزامي
والوقت في عهدي .. يبرهن وكاده

أنا جنوني إنت .. وأول هيامي
وأكبر طموح القلب .. وآخر مراده

وأغلب تفاكيري .. وجل إهتمامي
ودق الخفوق .. وميلته .. وإنقياده

وأهدافي بد نياي ... وأقصى مرامي
وطعم الفرح .. عقب التعب والنكاده

وشمس الهوى داخل .. سماي وظلامي
وأجملْ أماني خاطري .. مع وداده

وأحلى السهر وإن جيت حزة منامي
كنك تسافر بي .. لدنيا السعاده

يعني أنا مدمن .. أشوفك أمامي
يعني انا .. واحد عيونك بلاده

يعني لو إنك رحت .. يعني إنعدامي
يعني وفاة اللي رخص لك فؤاده

وإنْ كانك مكذب .. فهذي عظامي
شف ختمْ حبك وسطها .. وإعتماده

وإفهم بإنك مخطي بإتهامي
وخالف ضميرك لانوى بإعتقاده

وخذها عهد ... والله لإثبت كلامي
لأقول أحبك ..!! قبل نطق الشهاده