زمان الصمت - ضحوي الأسلمي
زمان الصمت عايشني وأنا عايش على التذكار
هذاك الوقت هو كلي حياتي وأجمل أيامي
مع اللي كانت أشبه بالربيع وطلة الأزهار
هذيك اللي أموت بطيفها لامر قدامي
وأرد احيا.. وأرد اموت.. وأرد احيا.. إلين احتار
سبايب رمشها يوم أنْ نطحني كنه سهامي
سهام كنها جيش سجد فوق الصباح وثار
بعد ماثار ثار الشوق وطاح وعود وقامي
شربنا من بعضنا البوح وهمس الحب والاسرار
الين الحب بأغصانه كبر ثم صار متنامي
مابين الثلج في فمْها وبين الجمرتين بنار
تذوقت الدفا والبرد.. جمال زلزل عظامي
نثرت الصدق في نزفي على كل الورق بأشعار
أبيها فالقصايد تنتثر من دون الاقلامي
حروفي كلها كانت تذوب بوصفها وتغار
من اللي كنت أصوّره بكلامي والغلا سامي
مقابلها ياكن الغيم الى من هل بالامطار
وإذا غابت عطشت من الوله وأصبحت أنا ظامي
الى من شفتها مره..!!أضيع..وأنتهي..وأنهار
وأقول إني فداها لو تبي جسمي مع أنسامي
والى من زولها مر بخيالي تسأل الافكار ؟؟
تقول: تحبها واقول : ( ألا يكفي هي هيامي..؟؟ )
هذاك الوقت أنا بعده عرفت ان الزمن غدار
بعد ماحالت الدنيا وضاعت كل الاحلامي
جزا الله من تسبب في تصاريف الحياه وصار
حسود مبغض طامع عجز في بغضه ينامي
وانا مانمت من راحت ..إلى من نمت نومي.. طار
أقوم أصفق يديني بالقهر وأمووت باأوهامي
مثل مايصفق المذنب دموع للذنوب كثار
بعد ماتاب وأتبع توبته ..حج مع صيامي
ومثل مايصفق المسجون وحكمه بالقصاص جهار
وسط سجنه قضى له عام...بعد عامه قضى اعوامي
وكما صفق اليتيم اللي وحيد ولا لقى له دار
تربى بعد دمعاته( برعاية دار الايتامي )
وكما الشايب إليا منه ترجى من ولدهْ البار
يخدمه !! بس ياحْسافه...توفى وزاد باالآمي
وانا وان قاله الله بالغلا ماشي على المشوار
ابصبر والجمل يصبر ..ابجمع باقي إحطامي
وحتى لو زماني صمت انا عايش على التذكار
انا والله يشرفني اكون بجرحها دامي