وحشتني - ضحوي الأسلمي

بالله أبسأل حضرتك ليش غايب..؟؟
وشفيك قاطعني وانا ميت فيك

وشفيك جافيني بليا سبايب..؟؟
والا نسيت اللي يحبك ويغليك..!!

كم لي أنا وياك وإحنا حبايب
أهديتني قلبك .. وأنا كنت مهديك

مهديك قلب فيك مغرم وذايب
حتى عشانك صار عاشق أهاليك

شف حبك بصدري غدا اليوم شايب
يجري مع عروقي .. ويذكر لياليك

قد قلت لك والله ماني بتايب
عنك ولايمكن بلحظه .. أخليك

وإن متْ في قبري وتحت النصايب
تبقى معي عايش .. ولاني بناسيك

مالك شبيه الا مزون وسحايب
هتانها يروي حبيب مفاديك

صدقني إنك صرت ( ثامن عجايب )
سبحان ياسكر شفاتك وحاليك

وسبحان ياليلك بسود الذوايب
وسبحان من ميز نعومة أياديك

وسبحان من غّلاك فوق القرايب
وسبحان من خلاني أبيك وأشريك

وسبحان من خلا فراقك مصايب
ماغير انا واللي بقى من تواليك

وحشتني .. بالله وشفيك غايب ..؟؟
وشفيك قاطعني .. وأنا ميت فيك