الغايبة - ضحوي الأسلمي
أنا ماني بذاك اللي ضعيف ويتبع شعوره
أنا شخص تحديتك وشوفي وش حصل تالي ؟؟
رجعتي معترف قلبك يسوق العذر بقصوره
رجعتي رجعةٍ حسره بدمع يطلب وصالي
نسيتي عهدنا الماضي وذاك الشوق وجذوره
مسحتي صادق اوراقي واخذتي قلبك الخالي
رحلتي مع عجاج الغير غديتي حيل مغروره
شروا قلبك لاجل حسدي لاجل موتي وغربالي
وانا بعدك تضايقت بغرام ينقل كسوره
رميته في بحر صبري رجايه تنجبر حالي
زهابي صمتي الموحش وفكر فاقد سروره
والى من جعت لوصالك ذكرتك جمر ولوالي
يناجي قصتي شعر حروفه تشكي بحوره
اسامر نجمة القمرا وتبكي عند موالي
لك الله انطوى عهدك ومات وانتهى دوره
دفنته في قبر غدرك بعزم وادري اشوالي
واذا كان الامل عندك.. ترا قد هدت جسوره
انا من هده ببغض نصاك بكل الاحمالي
واذا كنتي تحسبين الضلوع العوج مقهوره
تراها عودت تضحك تقول: الضحك يحلالي
مثل ماجيتي بدربي تريك اليوم مهجوره
هذاك الدرب روحي له عسا فالك مهو فالي
ولمي دمعك الكاذب ولاانتي صدق معذوره
ولاانتي غاليه عندي ولاني صاحب غالي
ولاني قايل كلمة ( جزاك الخير مشكوره )
لان الصبر باايامي خذا شكري وغنالي
انا فيني شموخ وعز رجل قاطع شوره
انا فيني طنا قوم رقوا بالمجد بالعالي
وانا ماني بذاك اللي ضعيف ويتبع شعوره
انا شخص تحديتك وشوفي ...وش حصل تالي !