ياوجودي - ضحوي الأسلمي
ياوجودي وجد منهو .. ماربح غير الهزيمه
إنطعن بين الضلوع .. ومات حلمه في ثواني
وياوجودي وجد منهو .. عاش حقران وهضيمه
بعد ماعاش المعزه .. باافخم قصور ومباني
وياوجودي وجد منهو .. منسجن لكن ظليمه
ينتظر حكمه قصاص .. وأصبح المظلوم جاني
وياوجودي وجد عود منكسر.. ماله عزيمه
شايب ماله عيال .. وبالمرض دايم يعاني
وياوجودي وجد طفل مالقى أم رحيمه
من صغر سنه يتيم وفاقد معنى الحناني
وااه ياحزن القصايد .. وااه يانفس سقيمه
وااه ياويلي على اللي حبها ياناس ثاني
ودعتني والمحاجر .. دمعها.. هتّان ديمه
ودعتني ليت موتي لحظة التوديع جاني
أشهد إن اللي تحبه لارحل أكبر جريمه!!
لارحل عّنك وقفّى .. وإنهدم صرح الاماني
لارحل واللي بقى لك طاري الذكرى القديمه
لارحل وأحزان بُعده خيّمت وسط المحاني
لارحل والقلب ينشد وين منهو..في صميمه
ثم عزف آهات نبضه.. في مواويل واغاني
أشهد إني من بعدها حالتي ماهي سليمه
كل ماأشكي للمواني .. تشتكي كل المواني
عقبها .. الدنيا الكبيره .. مالها والله قيمه
اه ياويلي عليها .. واه ياوقت عصاني