خلاص أنا مبسوط - ضحوي الأسلمي
يعني سبب مزحه بسيطه.. زعلتي ..!!
وأخلفتي عهود الغلا !! .. ياخساره!!!
يرضيك يوم إنك لقلبي وصلتي..!!
ودك بتحطيمه .. وساعة دماره
يرضيك قتلي عقب ماانتي حصلتي..!!
على خفوقي لين صرتي ( شعاره )
ياكم لتفكيري وعقلي شغلتي..!!
وياكم لفا زولك بحلمي .. وزاره
مايكفي إنك في ضلوعي دخلتي..!!
خليتك( الحاكم ). وبعت( الأماره )
وإنتي على غدر الليالي زهلتي
قلتي :( معاك الشوق بمشي مساره )
وهالحين وبكل البساطه جهلتي
والحب هديتي مقره وداره
حتى ولاأنتي يوم رحتي سألتي ..؟؟
تبين ليل البعد.. يتبع نهاره
وأنا الذي أسأل ..؟؟ إليا من أطلتي
عني غيابك..كل شارع .. وحاره
والله مدري كيف صار وفعلتي ..؟؟
وشلون ( وقعتي ) فراقي .. قراره
وألا تحسبين الجفا .. لا رحلتي
ينفْعك .. والا ... تحسبينه .. ( شطاره )
تدرين عاد ولايهم إنْ قبلتي
أبختصر لك مابقى في .. عباره :
أبمسحك .. وإن صار وألا إتصلتي ..!!
بعطيك ( رفض ) .. ودقي 2000 تاره
خلاص أنا مبسوط يومك .. زعلتي
بشرب من الشاهي .. وأولع ( زقاره )