السواحل والخبر تسألك وينك ! - ضحوي الأسلمي
( الخبر ) بعدك حزينه... يا( منيره )
والسواحل تشتكي وتقول .. وينك ..؟؟
والحياه بذمتي صارت .. صغيره
صارت اصغر من مساحة راحتينك
رحتي لديره وانا عنك ... بديره
والبقايا من رحلتي .. دمعتينك
دمعة فيها الوفا للوقت سيره
ودمعة فيها الغلا .. وأجمل سنينك
حالتي من يوم فارقتي .. خطيره
ميت وعايش .. على رجعة حنينك
أشهد إن الحظ وقف في مسيره
يوم قالت لي وداعيه .. يدينك
وأشهد إن الوقت أبد مافيه خيره
يوم حال البعد مابيني وبينك
كنْ بعدك للشعر ناوي يثيره
وكنه لقلبي يقول الله يعينك..!!
كل ماأشمْ الهواء .. يصعب زفيره
اه .. ياصدري ... على نبرة ونينك
وااه ياللي للنساء فتنه وغيره
كامله والكامل اللي حط زينك
جاوبيني كيف أبضحك ياعشيره ..؟؟
وأتناسا ضحكتك .. مشيك .. ولينك
كيف أبنسى عطرك وريحة عبيره..؟؟
رقتك .. همسك ... ووردي شفتينك
كيف أبكتب والقلم حاله مريره..؟؟
وأنْ كتب يكتب .. ( بربي فاقدينك )..!!
طالبك بس إذكري منهو مصيره
هو مصيرك .. والعهد تذكر يمينك
وإذكري من سّكنك بااقصى ضميره
ساجنك والا الصحيح ... إنه سجينك
وإذكري من كنتي بجوفه كبيره
من غلاتك صار يغلي والدينك
وإذكري مافات مرات كثيره
وإحفظي عرش الهوى في وسط عينك
وإذكري إسمي ولاتطرين غيره
إن قدرتي ياعسى الله .... لايهينك
دام حتى الموج يسأل يا( منيره )
والخبر صبح ومساء .. تسألك وينك ؟!