زرع القصايد - ضحوي الأسلمي
ماضي وعدّى وإنقفل للزمن باب
وش جايبك والحب بيدك قتلته
إن قلت لي ناسي !! بقول أنتْ كذاب
إسألْ حنيني يوم رحت وجهلته
رحت ونبت زرع القصايد على كتاب
والجرح مدري كيف منك إحتملته !!
ماكني الا ضيف والدمع ترحاب
ليتك وصلت بحالتي ماوصلته
وش رجعّك لاتقول هالشوق غلاب!!
عذرك اذا هذا ترا ماقبلته !!
لنْ السهر عشعشعلى روس الأهداب
وثقل الألم من فوق الامتان شلته
تركتني مطعون ملتاع منصاب
شف صورة الذكرى وشف ما عملته
أكرمتني بالصد وأنواع الأتعاب
طيب أنا هو فيه شي بخلته !!
كانت سوالفنا بضلعي لها أطناب
وليل الغلا لاجيت قمت وشعلته
لبستك ايام الوله عطروثياب
وبالي على أحضان اللقاكم شغلته
تدري وش أصعب شي مابين الأحباب؟
إنه يهون بناظرك من جعلته:
واحد ويسوى كل ربعك والأقراب
والمستحيل الصعب لأجله فعلته
لاتقول لي حنيت والحب ماغاب
الحب قبل تروح بيدك قتلته