مشاكل غيبتك - ضحوي الأسلمي
يالعنبو غيبتك وشلون حدتني..؟؟
على طريق ماكنت أفكرأمشي به
هناك يم الحزن والويل ودتني
خلتني أكبر حزين شايل مصيبه
وسفينة البعد يم الضيق رستني
والهم بأقصى الحنايا كم عوى ذيبه
أشكي وذكرى الغلا بالحيل بكتني
أشكي ولامن يرد الصوت ويجيبه
من كل صوب ( مشاكل غيبتك ) جتني
مدري متى ينتهي حزني وهالغيبه ..؟؟
تدرين أحبك..ونار الحب خلتني
أحب قربك..وغيرك ويش أنا أبيبه
وتدرين وش كثر ياقلبي مهمتني
وماهمني لو هوانا الخلق تدري به
مافيه غيرك من الزينات شدتني
في لبسها والحلا والملح والهيبه
في مشيها لاقبلت ...والا تعدتني
في شعرها اللي نجوم الفن تضوي به
في عطرها... والدلال...ولاتبلتني
بسهام عين تتل القلب وتصيبه
ولافيه غيرك من الحلوات أعطتني
معني الغرام وحنان كنت ودي به
وشلون أبنساك والذكرى تحدتني ..؟؟
تجيب طيفك وتتركني أهذري به
أذكر منامي بعينك يوم غطتني
أهدابك اللي منايا الخلق تحري به
وأذكر صباح الخدود ويوم صحتني
شمس ضياها ( صبح الخير والطيبه )
وأذكر ولاأنسى شفاهك يوم ضمتني
في جمرها اللي تدفيت بلواهيبه
واليوم هذي همومي تعتلي متني
كبرت جروحي وقلبي زاد تعذيبه
ومن كل صوب ( مشاكل غيبتك ) جتني
ولاأدري متى ينتهي حزني وهالغيبه..؟