شجون - ضحوي الأسلمي
من بحر عذب القصايد جيت أبوصف( ياشجون )
وأدري إني لو وصفتك .. ماوصلت أقصى حلاك
كيف أبوصف وانتي اجمل في عيوني مايكون..!!
كيف والليل يتباهى .. لاسهرتي .. من بهاك
تفتنين اللي يشوفك .. بالخدود وبالجفون
وإنْ همستي مات منهو .. قد سمع همسة .. شفاك
وإنْ وقفتي وقفت لك .. السحايب والمزون
وإنْ مشيتي كل كونك صار يمشي لك وراك
وإنْ ضحكتي قام يضحك .. كل ضايق ومحزون
وإنْ حزنتي لو دقيقه .. حزّن الجوري .. معاك
وإن زعلتي لأي داعي .. الكواكب يزعلون
وإن رضيتي كل شي صار .. يرضى من رضاك
وإن صحيتي غردت لك البلابل .. باللحون
وإن رقدتي قال حلمك :( يسعد الله لي مساك )
فيك من طبع الرواسي .. الركاده والسكون
وفيك من طبع السواحل .. الملوحه والهلاك
وفيك انا من جد مره.. واصل حد الجنون
بس شعره والا يمكن .. ينتزع عقلي غلاك
يكفي إن الصعب لإجلك .. في ثواني لك يهون
وإن نور الشمس يعكس للبشر طلة ضياك
إطعنيني لاعدمتك .. اطعنيني بالمتون
لن حتى الطعن منك .. تشبهه لحظة لقاك
وإذبحيني لا كشختي .. بالنقاب وبالعيون
وبالغنج وابو التدلع .. جعلني .. والله فداك
والله ان الخافق اللي ميت بك .. مايخون
وافي لك طول عمره .. همه يوفي وفاك
ووالله إنك لا اتصلتي .. والا دق التيلفون
قمت اردد قبل اجاوب .. يابعد هذا وذاك
قمت أردد ياهلا بك .. أرحبي .. ( يالزيزفون )
ياهلا بالساعه اللي جابتك لي .. يا ( ملاك )
والا انا هالحين جيتك .. لكن أدري ياشجون ..!!
صعب أبوصف!! وإن وصفتك .. ماوصلت أقصى حلاك!!