كويتية - ضحوي الأسلمي
قبل ماتقلع الرحله رحلت لعالم ثاني..!!
رحلت لكوكب اخر وشفت الموت بعنيّه
رحلت وكني المذهول بدون إدراك ماجاني
رحلت وكني اللي راحل بااحلام ورديه
مع اللي شفتها صدفه تناظر كن تحداني
تحداني وأنا ادري رابحه ملين بالميه..!!
لها هيبة عقيد القوم أو الرزه لسلطاني
بها كل الجمال اليوسفي.. صوره خياليه
يغطي عينها جيش على العشاق عدواني
على كل الملا يعلن حروب العشق إباديه
على شط الكحل شفت الهلاك وصرت غرقاني
يشيل الموج الاسود جثتي لأقصى موانيه
وحييت بقذلة مدري من أي ألوان وألواني
لها لون غريب ..وأقرب التوصيف خمريه
وبنيت بشمس ذاك الخد كثير أحلام وأماني
وذخرت بشفة الحلوه دفا وإن جت شمااليه
وخضعت لعقد لولو وإنتهيت وزادت أشجاني
ونخيت بحور شعري كلها معها الهجينيه
وأنا أدري في قصيدي لانخيته دوم ينصاني
يجيني كنه أشجع من وطت بالقاع رجليه
وأنا ماكنت أحسب إني ضعيف الحكي بلساني..!!
إلين الرجل ساقتني أجيها وأصدق النيه
وصلت وقصدي أتكلم ولاأدري ويش خلاني..؟؟
أناظر.. أسكت.. أتأمل.. ببنت كن حوريه
وبعد ماخفت لاتمشي...وقبل مايفوت الاواني
نطقت وقلت: من شفتك وانا ( والله مافيّه..!!)
أبي اعرف من اي الناس منين.. من اي الاوطاني؟
ملامح حضرتك تنبي تقول إنك خليجيه..؟
من البحرين والا من قطر والا من عماني؟
من اهل دبي والا بالرياض او انكْ كويتيه..؟
دخيلك ياجمالك ووين.. رحل بي وين وداني
أنا طالبك تكفين إرحمي من جاك يابنيه
عطيني مثل مارب عطاك الزين واعطاني
عطاني منظر إعجابك وهذي بصمة إيديّه
لك الله وان مشيتي زاد.. قهر حالي وحرماني
واذا ودك تزيديني ( عساها ماهي بهيّه )
ولدّت بالعيون السود وقالت ين تلقاني..؟؟
انا عنك بعيده.. لاتحسب إني سعوديه..!!
ظروفي ماتساعدني لو إنك جيت لي عاني
لو إنك مشتري بعدي مع الروحات والجيه
ولكن بذكرك لامن شعاع الصبح صحاني
وبذكر كل مايرسل قمر ليل العنا ضيه
وبذكر هالمطار وموقفك كان الله أحياني
ولك مني قبل ماارحل سلامي والوداعيه
وداعيه على خير وعسى مايكون تنساني
وعلى فكره قبل ماامشي انا وحده كويتيه..!