قطعة البسكوت - ضيدان المريخي
يامحمد طرق باب سمعي صوت
انسيابي يصب الولع بسكات
ان تكلم يازين الحريم سكوت
وان سكت قلت يفدنه الاصوات
ينعش الروح بالخاطر المكبوت
يسكن القلب حب ويسر الذات
ياسلامي على قده المنحوت
مالقى الشوف في قامته عثرات
ضامرٍ تشبعه قطعة البسكوت
كل يومٍ يقولون جاع ومات
لامشى خطوته ماتعدى فوت
عقرب الثانيه داخل الساعات
في محياه نور القمر مكتوت
يفضح النور ويضيع اللمبات
زين غيره حسب شوفتي ممقوت
ماترك للعذارى ياكود فتات
من عجايب جماله تطيح كروت
لاجلها مايحبنه البنات
اعتقد لو يبي يلعب البلوت
كان الاولاد عنده من اول زات
قال ويش انت شايف وقلت الموت
في محياك ياسيد الخفرات
قال قل بي من الشعر عشر بيوت
قلت خل القصيد اسمع الونات
انت حسنك لعين المولع قوت
ياحبيبي ماهي باكبر الشكات
عاد لو مد لي تين والا توت
قلت له الف شكرا على الشربات