عجاج افكارهم - ضيدان المريخي
سم ياشاعر تعوذ من ابليس ووحد الله
واذبح الضيقة ودرب الياس بالصدر الشمالي
ياخوي البدر ياجار النجوم المستقله
الفضا صدره وسيع ولايضيق من الاهالي
كل ماثور عجاج أفكارهم بالارض خله
قل سلام الله على وسع الفضاء وانا لحالي
مادريت ان الهوا له بالوطاء تسعين مله
لين يجمع لك سراب القيض في خضر المفالي
والمدى ماضاق يارجال من صفحة مجله
ضيقوا فيا مساحات الجزال من الهزالي
مشكلة لا جيت للناقص بشبر الوجه كله
والخطا وان جيت سوق الرخص وانت انسان غالي
كل عينٍ ماتعاف النوم في جفن المذله
فالها سهر الليال المقبلات بكل حالي
والقصيد اللي خذوه الناس سيف بدون سله
يذبحون ويسلخون وهم على حمر الزوالي
يوم ماباقي على ظهور المهار الا الاجله
كل يومٍ تلقح العاقر ف ابو زيد الهلالي
يوم طاح الريح ووجيه الليالي مسفهله
جت علومٍ مالها وسط الحلوق اول وتالي
يمطرون ارض القصيد بسحب صيفٍ ما تعله
لج راعدهم ولا فزت لهم جرد السهالي
في زمانٍ فيه حتى الاخيله صارت مخله
شف بنات افكارهم لاهي بنات ولا عيالي
علموا بنت الخيال اللي نواعسها مظله
لا تضايق كل ماغنوا لها يالالالالي
ان نشف ريق الكلام العذب من صدري تبله
وان بغت تسبح مع الغيمه تعزوى في خيالي
يحسبون البدر يوم انه نحف لاجل الاهله
مايعود كامل الاوصاف في بيض الليالي