راكب اللي - ضيدان بن قضعان

راكب الي ما تجيبه وكالة بال بيد
ولا يجيبه بهبهاني ولا وضيحي قطر

ادهمن وسم الجميحي على جنبه جديد
مهبل الي عرض يحسب انه شفر

جمس شكمانين ملقبينه بالوليد
من سرى به مايغبط القصيبي والجبر

كاتبين في ضمانه حديده ما يبيد
تمرة قاري عليها حفيد ابو بكر

كن وجهه لا نطحته تشعشع صبح عيد
وان قفيته كأنه السيل لا سال وحدر

وان عرض لك في مزاياه من عنق الفريد
ولا ركبته تحسب انك على سطح القمر

دقته نغمة عبادي على سلم فريد
لا عزف الاول جاوب على عاشر وتر

لأ شتغل قالت شكامينه ارسل يا حديد
والتروس تقول للقاع ولي يا فقر

والبلوف تقول للكهرب هل من مزيد
والسيور تقول للمروحه هل من مفر

وكن في الشكمان الايمن صدى عبدالمجيد
وكن في الشكمان الايسر صدى نايف صقر

تحت كبوته من الفن طيران وعبيد
ما يغنون المسافه ولا طال السفر

كل اغنيهم على الدرب واصل يا عنيد
لين تلفي قصر شيخاً على العليا شهر

سايقه من صلب ربعي وله باساً شديد
ما يهاب البعد والليل والموت الحمر

من صناديد ال عرجا هل العلم الوكيد
لابتن من جن تمشي على هيئة بشر